◾
मी तसा दिसतो शहाणा, पण तुम्हाला सांगतो
आत माझ्या एक वेडा शेखचिल्ली राहतो!
बोलणे जेथे जरूरी, गप्प असतो मी तिथे
आणि जेथे गप्प व्हावे, फार तेथे बोलतो!
यामुळे तर मोडला नाही कधी माझा कणा
चार नोटा फेकल्या की, मी जरासा वाकतो!
चार चौघांनी बनवले एवढे सोज्वळ मला
की सहज माझ्या खिशावर मित्र डल्ला मारतो
कान हलका ठेवल्याची भोगतो आता फळे
रात्र सारी या कुशीवर, त्या कुशीवर काढतो!
( पाठलागावर तिच्या आहे असे समजू नका )
बाप आहे ना मुलीचा... लक्ष थोडे ठेवतो!
-
राजेश्वर पांडुरंग शेळके, नाशिक
9423542224
