देशभक्तीचा नव्याने रोकडा व्यवहार आहे

■

देशभक्तीचा नव्याने रोकडा व्यवहार आहे

लूट ज्याला मान्य नाही तो नवा गद्दार आहे

ही तुझ्या रक्तातली खळबळ अशी दावू नको

चळवळीला दाबणारा नेमका सरदार आहे!

या दिशेला येत नाही तो सुगंधी मंद वारा

या दिशेला नेमके पडक्या घराचे दार आहे

माणसांना राहिला ना दौलतीचा सोस काही

जीव झाला प्रिय केवळ, बाकी सब भंगार आहे!

भेटल्याने कर्जमाफी मोकळा झाला गळा

सावकाराच्या घराला कोण ठोठवणार आहे?

कोणत्या जातीतला आहे तपासा नाव आधी

काय त्याला द्यायचे ते त्यावरी ठरणार आहे!

-राजेश्वर शेळके, नाशिक

9423542224

गांजलेल्या माणसांनी सांग कोठे जायचे?

■

गांजलेल्या माणसांनी सांग कोठे जायचे?
आसवांना प्यायचे, की उंबरे झिजवायचे?

मौक्तिके माळेतली एकेक निखळू लागली
मूर्तिके, कुठल्या फुलांनी मी तुला सजवायचे?

चेहऱ्यावर छापली होती सविस्तर काळजी  
काय मी सांगू जगाला? कोणते लपवायचे?

पुण्य वाटुन घ्यायची जागा खरे तर इस्पितळ
पण तिथेही बेत दिसले रुग्ण वाटुन घ्यायचे

कर्जबाजारी घराचा मूक झाला हुंदका
घरधण्यामागे अता हप्ते कुणी फेडायचे?

( घेतली नाही कधीही काळजी झाडा तुझी
काय मागू मी तुला? अन् तू तरी का द्यायचे?)

या जगाला भेट दे तू एकदा ये विठ्ठला...
सोडशिल तूही स्वतःला देवबिव समजायचे!

जन्म देतानाच ही आज्ञा कपाळी गोंद तू
रिक्त हाती यायचे अन् रिक्त हाती जायचे!

बघ, तुला जमलेच तर, दे श्वास थोडासा मला
आणि त्या बदल्यात मित्रा, ने तुला जे न्यायचे!

-राज शेळके, नाशिक
9423542224