गझल । दुनियेत जाणत्यांच्या वेडा ठरू नको

📌

दुनियेत जाणत्यांच्या वेडा ठरू नको

जे अंथरूण आहे,ते पांघरू नको

घरट्यातल्या पिलांच्या चोचीत घास दे

घरटे कसे रिकामे... चर्चा करू नको

डोळ्यांस शिस्त थोडी लावून यार घे

झाली सुरू कहाणी की पाझरू नको

बहकत असेल मुलगा चॅनल बघून तर

मैत्रीत सांग त्याला...तू हादरू नको

मालक लबाड होता, इतकेच बोलला

आम्हास खोकणारा भाडेकरू नको

धनधान्ययुक्त राहिल कोठी तुझी सदा

गरिबांस वाटताना मागे सरू नको

शतकात एकदा हे सद्भाग्य लाभते

संधी तुला मिळाली, तर बावरू नको

डोळ्यांत वाच पैसे, तुटकी परिस्थिती

नुसता हपापल्यागत गल्ला भरू नको!

✒️

-राजेश्वर शेळके, नाशिक

9423542224

rajshelkenashik.blogspot.com