■
दोघांसाठी हेच केवढे सुखकर आहे
तुझ्या नि माझ्यामधे पुरेसे अंतर आहे
जरा स्वतःच्या आत तळाशी डुबकी मारा
कळेल मग हा खोल किती भवसागर आहे
ज्या दारावर कुणी सुखाची भीक मागतो
दुःख हासते, म्हणते, हे माझे घर आहे!
सांगा थकलेल्या पायांना, थोडे सोसा
मखमल अंथरलेला रस्ता नंतर आहे!
किमान इतके ओळखण्याची बुद्धी लाभो
कोण कुणाच्या जगण्यामधला अडसर आहे
जो जो जितका जितका धार्मिक बनला येथे
सोज्वळ होता आधी, आता कट्टर आहे
मृत्यू जेव्हा स्पर्शून जातो तेव्हा कळते
जगणे हा तर मृत्युच्या वरचा थर आहे!
-राज शेळके, नाशिक
profrajshelke.blogspot.com
9423542224
No comments:
Post a Comment