◾
भले नव्हे हे बुरेपणाचे लक्षण आहे
चिडचिड होणे पराभवाचे लक्षण आहे!
जीव लावला ज्यांनी त्यांना शिडी समजणे
तुझ्या मनाच्या खुजेपणाचे लक्षण आहे!
इतकी तंद्री, इतक्या खस्ता, इतक्या धडका...
वेड नव्हे तर अन्य कशाचे लक्षण आहे?
बरेच अंतर निघून आलो आता आपण
अता थांबणे खुळेपणाचे लक्षण आहे!
अपुल्यापुरती दुनिया झाली ज्याची त्याची
आणि म्हणे की नव्या युगाचे लक्षण आहे!
वेळ लागु द्या, पण देण्याची दानत ठेवा
जाणिव असणे जितेपणाचे लक्षण आहे!
हजार वेळा हरून सुद्धा पुन्हा तयारी?
हे योद्धयाच्या पराक्रमाचे लक्षण आहे!
-राजेश्वर पांडुरंग शेळके, नाशिक
9423542224
No comments:
Post a Comment