■ पापण्यांचे पाळणे
पापण्यांचे पाळणे करशील बहुधा
वाट माझी पाहशिल; रडशील बहुधा
एकट्याने चालतो आहेस मित्रा
जा पुढे पण, एकटा थकशील बहुधा
चेहऱ्यावर काजळी आली कशाची?
लाख चिंताचा धनी असशील बहुधा
ऐकल्यावर दोन शब्दाचा खुलासा
तू मला वेडा खुळा म्हणशील बहुधा
आठवण जेव्हा तुला येईल माझी
हासताना आसवे पुसशील बहुधा
ज्या सुखासाठी तुझे आयुष्य गेले
ते बघाया तू इथे नसशील बहुधा!
-राज शेळके, नाशिक
9423542224
No comments:
Post a Comment