ज्याचा अडलेला हात...
ज्याचा अडलेला हात
त्यानं धरावा संयम
शब्द खुटीला बांधून
हाती ठेवावी दावण
ज्याचा अडलेला हात
त्यानं करावं एवढं
धरी डोक्याला गारवा
आणि जिभेला साखर
ज्याचा अडलेला हात
त्यानं बोलावं जपून
घ्यावी माघार जराशी
आणि रहावं नमून
ज्याचा अडलेला हात
त्यानं सांगावं मनाला
असे हजार गांजले
वेळ टळली कुणाला
ज्याचा अडलेला हात
त्यानं लपवावी कळ
वेळ बदलता येते
लावी प्रयत्नाचे बळ
ज्याचा अडलेला हात
त्यानं सूर्याला पहावं
आज मावळला जरी
उद्या उजळून यावं
✒️
राजेश्वर पांडुरंग शेळके, नाशिक.
9423542224
No comments:
Post a Comment