◾
मुलं जेव्हा बोलतात
काळजातून
तेव्हा फक्त ऐकायचं
त्यांच्यात हरवलेलं
आपलं लहानपण
नुसतं नजरेने न्याहाळायचं
ते सांगतील तुम्हाला
छोट्या मोठ्या गोष्टी,
करतील तक्रारी, सूचना वगैरे
ठेवतील तुमच्याकडून अपेक्षा
धरतील तुम्हाला जबाबदार
कदाचित दोषीही म्हणतील तुम्हाला...
तेव्हा तुमचा तोल
ढळता कामा नये
तुम्ही हादरलात
तुमच्यावरचे आरोप ऐकून...
हे मुलांना अजिबातही
कळता कामा नये!
कारण मुलं जेव्हा बोलतात
काळजातून
तेव्हा ती फक्त बोलत नसतात;
आरसा धरत असतात
मोठ्यांसमोर
त्यांनी जाणीवपूर्वक लपवून ठेवलेला!
साधी नसतात मुलं
ती तर असतात
देवाघरची फुलं
टोचला त्यातील एखादा काटा
तरी हसायचं
मुलं जेव्हा बोलतात
काळजातून
तेव्हा फक्त ऐकायचं!
सोपं नसतं मुलांच्या मनात
हळूच घर करणं
त्यापेक्षा किती सोपं असतं ना?
त्यांना 'गप!' म्हणणं!?
-
*राजेश्वर पांडुरंग शेळके, नाशिक*
9423542224
No comments:
Post a Comment