जय जय शिवराय

                                                                                    ■

जय जय शिवराय!

बनून वारा घुमु दे नारा... जय जय जय शिवराय!

मंत्र बनु दे चेतवणारा... जय जय जय शिवराय!!

गडागडावर तटातटावर उठू दे भगव्या लाटा

शिवबाचा जयकार गर्जती सह्याद्रीच्या वाटा

तेजसूर्य तू धगधगणारा...जय जय जय शिवराय

मंत्र बनु दे....।।१।।

छत्रपतींच नाव गर्जता फुलुन येते छाती

तुम्हांचसाठी फक्त मावळा शीर घेतसे हाती

दहा दिशांना एक गर्जना...जय जय जय शिवराय

मंत्र बनु दे....।।२।।

चला उठा रे एक होऊ या मर्द मराठी सारे

रक्तामधुनी फक्त वाहू दे मर्द मराठी वारे

एकजुटीचा एकच नारा ...जय जय शिवराय

मंत्र बनु दे चेतवणारा... जय जय जय शिवराय!!

जय जय जय शिवराय...जय जय जय शिवराय

                         © राज पांडुरंग शेळके

                              9423542224

                                  नाशिक

गझल । दुनियेत जाणत्यांच्या वेडा ठरू नको

📌

दुनियेत जाणत्यांच्या वेडा ठरू नको

जे अंथरूण आहे,ते पांघरू नको

घरट्यातल्या पिलांच्या चोचीत घास दे

घरटे कसे रिकामे... चर्चा करू नको

डोळ्यांस शिस्त थोडी लावून यार घे

झाली सुरू कहाणी की पाझरू नको

बहकत असेल मुलगा चॅनल बघून तर

मैत्रीत सांग त्याला...तू हादरू नको

मालक लबाड होता, इतकेच बोलला

आम्हास खोकणारा भाडेकरू नको

धनधान्ययुक्त राहिल कोठी तुझी सदा

गरिबांस वाटताना मागे सरू नको

शतकात एकदा हे सद्भाग्य लाभते

संधी तुला मिळाली, तर बावरू नको

डोळ्यांत वाच पैसे, तुटकी परिस्थिती

नुसता हपापल्यागत गल्ला भरू नको!

✒️

-राजेश्वर शेळके, नाशिक

9423542224

rajshelkenashik.blogspot.com

गझल । संकटांची पायरी कर

■

संकटांची पायरी कर

मग यशाची खातरी कर

राग येइल... भेट त्याला

संयमाची ओसरी कर

गोष्ट नाही ना चुकीची?

वेळ लागू दे, खरी कर!

रिक्त होऊ दे मनाला... 

काळजाची बासरी कर

लाव हास्याचा मुलामा

दुःख थोडे भरजरी कर

घे तुला पर्याय दोन्ही

राज्य कर, वा चाकरी कर!

-राज शेळके, नाशिक

9423542224

त्याच्यासाठी...

📌

त्याच्यासाठी.!

कोण म्हणतो अभ्यास म्हणजे 

नुसता डोक्याला ताप आहे?

शाळा म्हणजे टाइमपास 

अन् शिकणे म्हणजे पाप आहे?

सांगा कोणाला प्रत्येक लेक्चर 

भकास,बोरींग, रटाळ वाटतं?

सांगा कोणाला शाळा सोडून 

अर्ध्यावरती कटावं वाटतं?

गृहपाठ कम्प्लीट कर म्हटल्यावर

 कोण फक्त रटा मारतो?

अधली मधली वाक्ये गाळून 

उभा आडवा पटटा मारतो?

वर्गामधला भाई बनून

 कोण दुसऱ्याला छळतो?

खिडकीमधून सर दिसले की 

आपल्या जागेकडे पळतो?

पहिला बेंच रिकामा असूनही 

कोण शेवटीच बसतो?

वर्गात कधिकधीच असतो, 

पण त्याला गमपस्तावा नसतो?

कोण वर्गात टॉन्टस मारण्यात 

सगळ्यात पुढे असतो?

आणि सरानी प्रश्न विचारल्यावर 

एकदम गुपचूप बसतो!

कोण आठवडयातून एकदा तरी 

खरपूस मार खातो?

आणि एवढं सगळं सोसूनसुद्धा 

खुशाल अॅबसेंट राहतो?

परीक्षा जवळ आल्यावरती 

कोणाचा चेहरा पडतो?

कॉपी करताना पकडल्यावर

सांगा बरं कोण रडतो?

प्रत्येक वेळेला रिझल्ट लागल्यावर 

कोण निकालपत्रक लपवतो?

आणि चुकून सापडल्यावर 

काहीही कारणं खपवतो?

सांगा त्याच्या अशा वागण्याचं 

असतं कारण काय?

अहो त्याला मुळात कळलेलंच नसतं

हाऊ व्हाट अँड व्हाय?

गणितातल्या उदाहरणानी 

पुरता जाम होतो 

व्याकरणाच्या नियमांनी 

बिचारा हैराण हातो

विज्ञानाची अवघड भाषा 

सुपीक डोक्यात शिरत नाही

नुसता अक्षराचा पाऊस, 

मातीत पाणी जिरत नाही!

इतिहासाच्या तारखा छळतात, 

भूगोलामधले मॅप्स,

पोकळी भरून निघत नाही, 

डोक्यात राहतात गॅप्स !

शिकण्याची हौस त्यालाही आहे 

पण त्याचं शिकणं होत नाही

कानावर फक्त एवढंच त्याच्या

"याला काही येत नाही!

थोडं जाऊ त्याच्या कलाने,

 मेथड बदलून पाहू 

शिकविण्याचं टेक्निक बदलू, 

रिझल्ट येतो का पाहू

शिक्षणाने त्याच्या चेहऱ्यावर

 स्माईल ठेवलंच पाहिजे

खरंच दोस्तहो,आपण त्याच्यासाठी

एवढं केलंच पाहिजे

एवढं केलंच पाहिजे!

✒️

-राजेश्वर शेळके, नाशिक

9423542224

कवितेची कविता

📌

निमित्तमात्र

कविते,
तुला यायचंच असतं जन्माला
अनंत अडचणींच्या सगळ्याच सीमा ओलांडून
तुला रोखू शकत नाही कुठलीही शक्ती कधीच
अगदी ठरवूनही

तरीसुद्धा माझ्या दुबळ्या कुडीचा
तू घेतेस आधार,
ढग दाटून वीज चमकावी
तशी चमकतेस माझ्या मेंदूमध्ये लख्खपणे एखाद्या अवचित क्षणाला,
आणि माझ्या हाताबोटांचं निमित्त करत उतरतेस कागदावर हळुवारपणे
एखाद्या नववधुसारखी.

तुझ्या केवळ येण्याने
माझी झोळी भरून जाते काठोकाठ
कौतुकानी आणि पुरस्कारांनी...

पण मला तेव्हाही ठाऊक असतं
की मी असतो केवळ निमित्तमात्र
केवळ निमित्तमात्र!


✒️
राजेश्वर शेळके, नाशिक
94235 42224

गझल । ओळखी

📌

■

ओळखी


घ्यायच्या ओळखी, द्यायच्या ओळखी
वेळकाळापुढे न्यायच्या ओळखी

रोज थांबायची सावली एकटी
मग उन्हाशी तिच्या व्हायच्या ओळखी

संपला फायदा, ओळखींचा जसा
पाय काढून मग घ्यायच्या ओळखी

बोलण्याची तऱ्हा सांगण्याची लकब
ओळखीचाच गाठायच्या ओळखी

ओळखी भेटल्या... ना जशा ओळखी
या जगाला किती भ्यायच्या ओळखी!

सूर्य कलला तशा ओळखी पांगल्या
टाळुनीया किती जायच्या ओळखी

खूप भेटायच्या... खूप बोलायच्या
खूप कामी अशा यायच्या ओळखी

ओळखींचा जरी त्रास झाला तुला
नवनव्या रोज पेरायच्या ओळखी!

वृत्त : स्त्रग्विणी


✒️
-राजेश्वर शेळके, नाशिक
© 9423542224

गझल । कुठले कुठले फासे फेकत असतो

📌


■

कुठले कुठले फासे फेकत असतो
मृत्यू अपुली धाव तपासत असतो

माणुस बाई दोन ध्रुवांची टोके
या टोकांना मध्य खुणावत असतो

पकडा, सोडा पुन्हा मुटकुळे बांधा
काळ मुठीतून हळूच निसटत असतो

त्या शब्दांचे अत्तर होते बहुदा
ज्या शब्दांतुन सुगंध पसरत असतो

जीवन म्हणजे बिनवल्ह्याची होडी
अन नावाडी पाणी कापत असतो

माणुस मरतो, पण तो विसरत नाही
कुणी जवळचा जेव्हा फसवत असतो

सरपण होउन जळणाऱ्याला सांगा
दुसरा त्यावर भाकर शेकत असतो


✒️
-राजेश्वर शेळके, नाशिक
9423542224