गझल । कुठले कुठले फासे फेकत असतो

📌


■

कुठले कुठले फासे फेकत असतो
मृत्यू अपुली धाव तपासत असतो

माणुस बाई दोन ध्रुवांची टोके
या टोकांना मध्य खुणावत असतो

पकडा, सोडा पुन्हा मुटकुळे बांधा
काळ मुठीतून हळूच निसटत असतो

त्या शब्दांचे अत्तर होते बहुदा
ज्या शब्दांतुन सुगंध पसरत असतो

जीवन म्हणजे बिनवल्ह्याची होडी
अन नावाडी पाणी कापत असतो

माणुस मरतो, पण तो विसरत नाही
कुणी जवळचा जेव्हा फसवत असतो

सरपण होउन जळणाऱ्याला सांगा
दुसरा त्यावर भाकर शेकत असतो


✒️
-राजेश्वर शेळके, नाशिक
9423542224