गझल । कधी असे जगायचे

📌

■

कधी असे जगायचे,कधी तसे जगायचे
कधी गुलाम व्हायचे, कधी सलाम घ्यायचे

पुढारली किती पहा, पुढ्यातली नवी पिढी
जुन्या रुढीस पोसणे तिला कसे जमायचे

मनात राहुदे तुझ्या मनातली खरी व्यथा
इथे निमित्त पाहिजे कुणासही हसायचे

दिवा असून का असा स्वतःस जाळतोस तू
तुझ्यात तेज राहते, तुला कधी कळायचे

जरी अबोल राहतो, नशेत छान बोलतो
जिवंत ठेवते तिला, नशा कसे म्हणायचे

प्रवास लांबला तरी नकोस काळजी करू
जरा विराम घ्यायचा...पुन्हा पुढे निघायचे!

वृत्त - कलिंदनंदिनी

✒️
राजेश्वर पांडुरंग शेळके
( प्रा. राज शेळके नाशिक )