■
ऐकण्यासाठी मनाचे कान केले
मी पुन्हा शब्दांस माझ्या म्यान केले
हात आधी जोडले... मग फूट केली
एवढेसे काम...पण तू छान केले
माणसे तर शांतता पाळीत होती
दंगलींचे हे कुणी फर्मान केले?
जेवढा एल्गार केला जिंकण्याचा
हारण्याने तेवढे बेभान केले
कोंडमारा काळजाला सोसवेना
शब्द आले... मोकळे मैदान केले
घेउनी अंदाज माझ्या ताकदीचा
भांडण्याच्या ऐवजी गुणगान केले
ही तुझ्या दारी कशी आली गरीबी
व्यर्थ सारे तू तुझे कुर्बान केले!
तुडविले नात्यांस साऱ्या ऐनवेळी
माणसांनी हे असे बलिदान केले
©राज पांडुरंग शेळके
नाशिक
#9423542224
No comments:
Post a Comment