◾
'सगळे काही...
पोटामधली आगच असते सगळे काही
वेळ बनविते माणुस डाकू, देव, कसाई
प्रत्येकाला छळतो येथे जाळ वेगळा
पुजतो माणुस प्रसंग पाहून दगडालाही!
माणुसकीच्या केवळ गप्पा नावापुरत्या
स्वार्थ काजळी काळे करते गोऱ्यालाही
माय माउली, बाप दादला, भाऊ दादा
तुला सांगतो जगी कुणाचे कोणी नाही..
तू दुनियेच्या बाजारामधली कठपुतली
नाच नाच तू... त्यावर ठरते तुझी कमाई
इथे वांझ शब्दांची केवळ अफरातफरी
हळूच बोला... इथे बोलण्याचीच मनाई!
तलवारीला धार असू दे... ढाल नसू दे
भयाण अंधारातच होते घोर लढाई
डोळ्यामधले अत्तरपाणी खरे बोलते
( कुणास ठावे का त्यालाही इतकी घाई? )
तुझे स्वतःचे जगणे सावर, सोड झमेला
घेउन जाइल खोल तुला ही बेपर्वाई...
कळेल तुजला एखाद्या वळणावर नक्की
वेळेवरती तुझे स्वतःचे कुणीच नाही!
राजेश्वर पांडुरंग शेळके
नाशिक
9423542224
No comments:
Post a Comment