घाबरू नकोस

*घाबरू नकोस...*

अचकट विचकट चेहरा करून
संकट जेव्हा धावून येईल,
धास्तावलेला चेहरा तुझा
निस्तेज होईल, सुकून जाईल...

तारेवरची कसरत तुझ्या
जीवावरती बेतून जाईल
हातामधली आधारकाठी
अर्ध्यावरतीच तुटून जाईल...

रात्रंदिवस विचार करशील,
मन-मेंदू जड होईल...
मनगटाच्या बळालाही
अशक्ताची कड येईल...

सगळी ताकद लावशील,
तरीही हाती फक्त शून्य राहील
कुठे चुकलं कळणार नाही,
मस्तक एकदम सुन्न होईल...

अपमानाचे बोल सोसून
जिणे जेव्हा हराम होईल,
बेईमानीच्या हाताखाली
इमान तुझं गुलाम राहील...

परिस्थितीच्या रेट्यापुढे
डोळ्यात पाणी भरून येईल,
भांबावलेलं रानपाखरू
पाण्यासाठी झुरून जाईल...

लहानसहान गोष्टींमध्येही
अपयश तुला खेटून जाईल,
'सूड घेईन...' म्हणून जेव्हा
खवळेल मन, पेटून जाईल...

तेव्हा,
घाबरू नकोस,
शांत हो!
ती वेळही निघून जाईल...!!

अंधाराला दचकू नकोस,
काळ का हा असाच राहील?
आकाशातली वीज बन,
सूर्यही मग तुझाच होईल...!

पुन्हा नव्याने सुरुवात कर,
विसर गेलेला काळ...
पुन्हा पेटू दे काळजामधला
विझत चाललेला जाळ...

भेकडासारखं रडून कुठे
मोठं होता येतं का?
पंख आखडते घेऊन
आभाळ कवेत घेता येतं का?

विचारपूर्वक निर्णय घे,
मग मांड पटावर डाव
भविष्याच्या ताम्रपटावर
झळकव तुझेच नाव...!

कोणीतरी तुझ्या पाठीशी
भक्कम आहे, विश्वास ठेव
डोळे मिट, दिसेल तुला
तुझ्या देव्हाऱ्यातला देव...

एक कर पण...

एक कर पण, धीर धर
हास जरासा...बघ वर...

डोळ्यांमधल्या आसवांना जमण्याआधीच पुसून टाक,
परिस्थितीशी लढण्यासाठी
मर्दासारखा उभा ठाक!

*एवढं सगळं करतानाही*
*सांभाळून रहा...तोल जाईल!*
*घाबरू नकोस पण,शांत हो!!*
*अरे, ती वेळही निघून जाईल !!*

✒️
*प्रा. राजेश्वर (राज) शेळके, नाशिक*
*सुसंवाद:94235 42224*

दुनिया

■

दुःखाचे गाठोडे पेलत जगते दुनिया

तरी हासते किती बहाणे करते दुनिया

कुठे जराशी जागा मिळता टेकायाला

हळूच ओझे हलके थोडे करते दुनिया

तोल तिचाही हजार वेळा ढळतो येथे

सावध होते, पुन्हा पुन्हा सावरते दुनिया

तिच्या मनाच्या खोल तळाचा हा गाभारा 

रोज नव्या स्वप्नांना येथे पुरते दुनिया 

जमेल तितके सांगत असते तुला मला ही 

सोबत घेउन बरेच काही मरते दुनिया 

कधी कुणाला उचलून घेते खांदयावरती 

कधी कुणाच्या सरणावरती चरते दुनिया 

तुला वाटते तितकी दुनिया सोपी नाही

लाखामधल्या एखादयाला कळते दुनिया!

-राजेश्वर शेळके

नाशिक

9423542224

एक कप्पा शेवटी

खूप झाली कौतुके आनंदही झाला जरी
एक कप्पा शेवटी दुखराच त्याचा राहिला!
- _राजेश्वर शेळके,नाशिक_
_9423542224_

लाजसुद्धा ऐनवेळी सोडता यावी...

■

लाजसुद्धा ऐनवेळी सोडता यावी

चेहऱ्यावर वक्र रेषा ओढता यावी

खेळ केला जर कुणी मुद्दाम भिडले तर

एक खेळी मग तुलाही खेळता यावी

ना कुणीही स्वच्छ धुतल्या तांदळाजोगा

फक्त अपुली घाण तितकी झाकता यावी!

कारणे परिणाम नंतर सांग दुनियेला

वेळ आलेली तुला निस्तारता यावी

कैक वळणांचा निसरडा घाट हे जगणे

तोल सांभाळून गाडी रेटता यावी

फेकला जाशील जेव्हा दूर वाऱ्यावर

स्वार हो! बस हीच संधी साधता यावी!

एकदम नाही सुचायाची तुला कविता

आतली खळबळ अगोदर ऐकता यावी

राजेश्वर शेळके, नाशिक

9423542224

दोघांसाठी हेच केवढे सुखकर आहे

■

दोघांसाठी हेच केवढे सुखकर आहे

तुझ्या नि माझ्यामधे पुरेसे अंतर आहे

जरा स्वतःच्या आत तळाशी डुबकी मारा

कळेल मग हा खोल किती भवसागर आहे

ज्या दारावर कुणी सुखाची भीक मागतो

दुःख हासते, म्हणते, हे माझे घर आहे!

सांगा थकलेल्या पायांना, थोडे सोसा

मखमल अंथरलेला रस्ता नंतर आहे!

किमान इतके ओळखण्याची बुद्धी लाभो

कोण कुणाच्या जगण्यामधला अडसर आहे

जो जो जितका जितका धार्मिक बनला येथे

सोज्वळ होता आधी, आता कट्टर आहे

मृत्यू जेव्हा स्पर्शून जातो तेव्हा कळते

जगणे हा तर मृत्युच्या वरचा थर आहे!

-राज शेळके, नाशिक

profrajshelke.blogspot.com

9423542224

मालक हुशार होता...

पाहिजे जे जे तुला...

■

पाहिजे जे जे तुला, घेऊन जा
फक्त आशेचा दिवा ठेवून जा

ही महामारी नव्हे;  ही अवदसा
जा बये, दुनियेस गुंडाळून जा

तू म्हणे असतोस पाठीशी सदा
ये असा, डोळ्यांपुढे... भेटून जा!

आपल्यामधली दरी मिटली कुठे?
ठेव अंतर; फक्त सांभाळून जा

एवढा जर हक्क आहे ना तुझा
तू उभे केलेस... तू पाडून जा

द्यायचे असलेच जर काही मला
चेहऱ्यावरचे हसू देऊन जा

स्वैर तू आहेस मी म्हटले कुठे?
ये उशीरा, पण घरी सांगून जा!
जा कुठेही, पण घरी सांगून जा!

-राज शेळके, नाशिक
profrajshelke.blogspot.com
9423542224