झाल्या चुका कुणाच्या...

▪️

झाल्या चुका कुणाच्या रागावले कुणी

कोणी निघून गेले... रेंगाळले कुणी!

होते कटात सामिल...घरचे बरेच पण 

कोणी कबूल केले...फेटाळले कुणी!

वेळेनुसार झाले सत्कार हे असे 

लाथाडले कुणी तर...कवटाळले कुणी!

होते बरेच अंतर चालायचे अजुन

कोणी थकून गेले...संथावले कुणी

गेले कळून अंती रुग्णास सत्य हे 

कोणास दुःख आहे...कंटाळले कुणी

गझले तुझ्यामुळे ही झाली दशा कशी

कोणी उजाड झाले...नादावले कुणी!

-राज शेळके, नाशिक

9423542224

प्रपोज

❤️

असाही प्रपोज...

▪️

शाळा सुटल्यावर रस्त्यावर भेटली ती त्याला...

सोडा रस्ता ताई प्लीज तो तिला म्हणाला..

हात अचानक धरला त्याचा, म्हटली ती नार

प्रेम तुझेही आहे कारे? मरते तुझ्यावर

चेहऱ्यावरती घाम दाटला गडी भलता भ्याला

सोडा सोडा ताई प्लीज... जाऊ दया ना! म्हणाला

म्हणे नार मी उत्तर घेईन तेव्हाच जाईन घरी

कुणालाच मी सांगणार नाही ठार मारले तरी!

म्हणे भावडया, का हो ऐशा गरीबाला नाडता?

घरी कळले तर, फार बडवतील, का हो फशी पाडता?

नार म्हणाली, आवडतो तू मजला मनातूनी

तुझ्याच नावावरुन चिडविती, मजला साऱ्या जणी

तुम्हाकडे ना कधी बघितले येता जाताना

कधी अडवला रस्ता तुमचा शाळा सुटताना?

हाच नेमका स्वभाव राजा आवडला रे मला

हो ना माझा व्हॅलेंटाईन, लाजाळूच्या फुला

मी तर पडलो सांब सदाशीव एकुलता एक

फादर माझे महाभयानक मला त्यांचा धाक

प्यार किया तो डरना क्या रे, ठाऊक नाही का तुला?

होकार घेईन तेव्हाच सोडीन, माझ्या लाडक्या मुला

वेळ जरा द्या सांगून बघतो माझ्या घरच्यांना

तुम्हीही या पण उदया विचारुन, मम्मी पप्पांना

आईबापाचे नाव काढता घाबरली नार...!

'जा रे डुचक्या' म्हणत पळाली, झाली तडीपार !!..

- राजेश्वर पांडुरंग शेळके, नाशिक 

9423542224

एकदाचा काढला काटा तुम्ही

📌

लोक करतिल काम अन् मरतीलही
फक्त येउन श्रेय ते लाटा तुम्ही!

◾

एकदाचा काढला काटा तुम्ही
चांगल्याच्या रोखल्या वाटा तुम्ही

चूक होती कस्पटाइतकीच पण
गावभर केलात बोभाटा तुम्ही!

सर्व खोटे एक झाले शेवटी
आणि केला न्याय उफराटा तुम्ही!

काल होती मस्तशी किलबिल इथे
आणला कोठून सन्नाटा तुम्ही?

खायच्या वांद्यात होता कालवर
आज अंबानी तुम्ही... टाटा तुम्ही!

लोक करतिल काम अन् मरतीलही
फक्त येउन श्रेय ते लाटा तुम्ही!

- राजेश्वर पांडुरंग शेळके, नाशिक
9423542224

पापण्यांचे पाळणे करशील बहुदा

■ पापण्यांचे पाळणे

पापण्यांचे पाळणे करशील बहुधा 

वाट माझी पाहशिल; रडशील बहुधा

एकट्याने चालतो आहेस मित्रा

जा पुढे पण, एकटा थकशील बहुधा

चेहऱ्यावर काजळी आली कशाची?

लाख चिंताचा धनी असशील बहुधा

ऐकल्यावर दोन शब्दाचा खुलासा

तू मला वेडा खुळा म्हणशील बहुधा

आठवण जेव्हा तुला येईल माझी 

हासताना आसवे पुसशील बहुधा

ज्या सुखासाठी तुझे आयुष्य गेले

ते बघाया तू इथे नसशील बहुधा!

-राज शेळके, नाशिक

9423542224

जगून थोडे घेऊ

जगून थोडे घेऊ

कुण्या काळचे जुनेच भांडण

कुरतडणारी कडू आठवण

उगाच छळणारे काही क्षण

विसरून थोडे जाऊ

चल, जगून थोडे घेऊ.....

कोण बरोबर? कोण चुकीचा?

सोबत फिरतो प्रश्न कधीचा

अडवून धरतो रस्ता पुढचा

प्रश्नच सोडून देऊ

चल, जगून थोडे घेऊ...

लहान-मोठे ठरवायाला

कोण रिकामा ? वेळ कुणाला ?

हजार कामे ज्याला त्याला

रस्ता बदलून घेऊ

चल, जगून थोडे घेऊ.....

आयुष्य म्हणजे मैफिल सुंदर

तयात मिसळू आपलाही स्वर

अवचित एखाद्या वळणावर

पुन्हा जवळचे होऊ

चल, जगून थोडे घेऊ...

राजेश्वर पांडुरंग शेळके, नाशिक

9423542224

दीपस्तंभ

"तुझा चेहरा, तुझे दाखले दीपस्तंभ बनतील इथे 

संघर्षांचे सर्व प्रवासी तुझे शिष्य बनतील इथे!"

■

दीपस्तंभ

तू ज्ञानाची पहिली ओळख तू तेजाचे नाव नवे 

तू गेला त्या मार्गावरती नवपक्ष्यांचे लक्ष थवे

अंधाराला भेदुन तेथे तू पेटवला दीप नवा 

स्पर्श तुझा झाला अन् झाली सुगंधित सारीच हवा

तू शब्दांचा असीम साधक तू ज्ञानाची भूक नवी

तू बुद्धाचा दिव्य उपासक तू अजरामर चिरंजीवी

तू जिद्दीची अमर कहाणी, तू यत्नांचे नाव दुजे 

अखंड ऊर्जा, स्वयंप्रेरणा, बा भीमराया नाव तुझे

खचलेल्यांच्या उद्धाराची तू शेवटची आस भीमा

तू लढणाऱ्यांच्या देहातील धडधडणारा श्वास भीमा 

तुझा चेहरा, तुझे दाखले दीपस्तंभ बनतील इथे 

संघर्षांचे सर्व प्रवासी तुझे शिष्य बनतील इथे!

जोवर राहील चंद्र चांदणे, जोवर राहील सूर्य नभी 

अखंड तळपत राहील तोवर भीमा तुझेही नाव जगी

तुझ्या दिव्य तेजाचा येवो अंश जरा आमच्यात भीमा 

तुझा त्याग,बलिदान लढाई सदा असो लक्षात भीमा!

राजेश्वर शेळके,

नाशिक

9423542224

कमाई व्हायच्या आधी..उभी खर्चायची यादी!

◾

कमाई व्हायच्या आधी
उभी खर्चायची यादी!

खिशाला चाचपुन बघ तू
कुठेही जायच्या आधी

वितळणे धर्म देहाचा
असू दे नर, असो मादी

म्हणुन तर मोडली काडी
कुणी नव्हताच संवादी

अरे ही जगबुडी आहे
नव्हे ही बातमी साधी

तुझी किंमत ठरव मित्रा
कुणी ठरवायच्या आधी!

-राजेश्वर पांडुरंग शेळके
9423542224