📌 बेस्टसेलर आणि आपण!

📌


📖📖📖📖📖📖📖📖
📚📚📚📚📚📚📚📚


बेस्टसेलर आणि आपण!

       बेस्टसेलर पुस्तकं म्हटली, की आपल्या डोळ्यासमोर यु कॅन विन, सिक्रेट, द मॉंक हु सोल्ड हिज फेरारी, हू मुव्हड माय चीज, रिच डॅड पुअर डॅड, चीपर बाय दी डझन ही नावे येतात. त्यांच्या विकलेल्या प्रति अक्षरशः लाखांच्या घरात असतात. आकडा पाहूनच थक्क व्हायला होेतं. आपलं इंग्रजी जेमतेम असतं ( किंवा तेवढा अर्थ काढत बसायला आपल्याकडे वेळ नसतो ) म्हणून आपण त्याची मराठी आवृत्ती घेतो, आणि त्या आकड्यात आणखी एकाची भर घालतो. हो की नाही?

मुद्दा इथे आहे!

    आपल्या किती मराठी लेखकांची पुस्तकं लाखांच्या आकड्यात विकली गेली असतील? किती मराठी लेखकांची पुस्तकं ऑस्ट्रेलियात,इंग्लंडमध्ये, यु एस मध्ये तिथली माणसं वाचत असतील?? मी तुमच्या चेहऱ्यावरचं स्माईल समजू शकतो. पण आपलं मराठी लेखन तेवढ्या ताकदीचं नाही असं म्हणत असाल तर तुम्ही घाई करीत आहात!
        अमृतातेही पैजा जिंकणारी सर्वगुणसंपन्न अशी आपली मराठी भाषा! हिची श्रीमंती काय वर्णावी? माझ्या मराठी भाषेचा ललाटास टिळा लावून अभिमानाने मिरवावं अशी आपली माय मराठी! आणि म्हणूनच आपल्या मराठी भाषेत लिहिलं गेलेलं लिखाणही अत्युच्च दर्जाचं आणि जगभर पोहोचवावं अशा पात्रतेचं नक्कीच आहे असं उच्चरवाने म्हणताना आपली जीभ चाचरता कामा नये. मग प्रश्न असा आहे की ही आपली ज्ञानसंपदा जागतिक पातळीवर ठळकपणे दिसत का नाही? जगातील दर सातवा माणूस जर भारतीय असेल तर जागतिक साहित्यात आपल्या साहित्याचा डंका का वाजत नाही?
      त्याचं उत्तर असं आहे मित्रांनो, की आपण आपलं साहित्य जागतिक बाजारपेठेत, जगाला समजेल अशा भाषेत नेण्यात कमी पडत आहोत!!
    बऱ्याच साहित्यिक व्यासपीठांवर या मुद्द्यावर गांभीर्याने चर्चा झडत आहेत. नामवंत समीक्षकांनी या मुद्द्यावर काळजी व्यक्त केली आहे. आपण इतरांचं साहित्य आवडीने वाचतो कारण ते आपल्याला आपल्या मराठी भाषेत उपलब्ध आहे, परंतु आपलं मराठी साहित्य इतर भाषांमधून इतरांपर्यंत पोहचवण्यासाठी आपण आणि आपले लेखक कितपत प्रयत्न करत आहेत? ज्यांच्या लक्षात ही गोष्ट आली, त्यांच्या पुस्तकांनी विक्रमी मजल मारली आहे. आमचा बाप अन आम्ही हे मा. नरेंद्र जाधवांचं आणि इडली ऑर्किड आणि मी हे विठ्ठल कामतांचं पुस्तक याचं ठळक उदाहरण आहे!
     बऱ्याच लेखक कवींना या मुद्द्याचं गांभीर्य आताशा लक्षात येऊ लागलं आहे. माझ्या सुदैवाने मला केंब्रिज युनिव्हर्सिटीच्या बिझिनेस इंग्लिश पर्यंत मजल मारता आली. बेक ही जागतिक दर्जा असलेली इंग्रजीची परीक्षा उत्तीर्ण झाल्यावर मायमराठीचा झेंडा सातासमुद्रापार लावण्याची संधी मला चालून आली. मी आवडीने कित्येक मराठी पुस्तकांचं इंग्रजीकरण करून त्यांना जागतिक बाजारपेठेत दिमाखाने उतरवतो आहे. इंग्रजी आता जगभरात स्वीकारली गेली आहे.जास्तीत जास्त मराठी पुस्तकांचं इंग्रजी रूपांतरण करण्याचा मी मनोमन निश्चय केला आहे. एक प्रकारे हा मायमराठीचा जागतिक जागरच आहे. माझ्यातला कवी जेव्हा एखाद्या काव्यसंग्रहाचं इंग्रजी रूपांतरण करताना त्यातला भाव मरु देत नाही, तेव्हा मूळ मराठी कविता इंग्रजीत वाचताना खूपच मस्त वाटतं.
प्रसिद्ध कवी विवेक उगलमूगले यांनी लिहिलेल्या 'आतला आवाज' या पूज्य महात्मा गांधींवर आधारीत कवितासंग्रहाचं काम आता अंतिम टप्प्यात आहे, तर नुकत्याच नागपूरहून आलेल्या मा. शंकर घोरसे यांच्या 'बा स्वातंत्र्या' या संग्रहाचं रुपांतरण पूर्ण झालं आहे.
       सांगायचं एवढंच की येत्या काळात जर तुम्ही कुठे फिरायला गेलात आणि तुम्हाला टोकियो, लंडन, वॉशिंग्टन, मॉस्को मधल्या एखादया लायब्ररीत नाशकातल्या आपल्या एखाद्या प्रिय कवी लेखकाच्या मराठी आवृत्तीचं इंग्रजी व्हर्जन वाचताना तिथला कोणी गोरा वाचक दिसला तर थक्क होऊ नका!

लवकरच तो सुवर्णक्षण येणार आहे!!

✒️
-rajshelkenashik